بلوچستان کے ضلع قلات میں بدامنی کا ایک اور سنگین واقعہ سامنے آیا ہے جہاں گڈان ہوٹل کے قریب نامعلوم مسلح افراد نے کوئٹہ سے تربت جانے والی “المنیر” مسافر کوچ پر اندھا دھند فائرنگ کر دی۔ ذرائع کے مطابق مسلح حملہ آوروں نے شاہراہ پر گھات لگا کر گاڑی کو اس وقت نشانہ بنایا جب وہ اپنے مقررہ روٹ پر جا رہی تھی، جس کے نتیجے میں بس میں سوار مسافروں میں شدید خوف و ہراس پھیل گیا۔ واقعے کی اطلاع ملتے ہی لیویز فورس، پولیس اور ریسکیو ٹیمیں فوری طور پر جائے وقوعہ پر پہنچ گئیں اور پورے علاقے کو گھیرے میں لے کر حملہ آوروں کی تلاش کے لیے سرچ آپریشن شروع کر دیا۔ سیکیورٹی حکام کی جانب سے قلات اور قریبی ہسپتالوں میں ہنگامی حالت نافذ کر دی گئی ہے تاکہ کسی بھی ممکنہ جانی نقصان یا زخمیوں کو فوری طبی امداد فراہم کی جا سکے، تاہم ابھی تک حکام کی جانب سے زخمیوں یا جانی نقصان کی حتمی تصدیق سامنے نہیں آئی ہے۔
